Modernism and Fashion

Exhibition / Art

Loading..

About Event:

Modernism and Fashion

Oktyabrın 6-da Heydər Əliyev Mərkəzində Aleksandr Vasilyev Fondunun təqdimatında 1960-cı illərin geyim və bəzək əşyalarından ibarət Modernizm və moda sərgisi açılacaq. Bakıda ilk dəfə təşkil olunan bu sərgi Heydər Əliyev Fondunun dəstəyi ilə keçiriləcək. 

Ekspozisiyada Aleksandr Vasilyev Fondunun unikal kolleksiyasından XX əsrin 60-cı illərinə aid 100 geyim nümunəsi və 350 aksessuar nümayiş olunacaq. 

Eksponatlar sırasında həmin dövrün məşhur dizaynerlərinin atelyelərində -Chanel, Dior, Balmain, Yves Saint Laurent, Balenciaga, Nina Ricci, Cardin, Couregge, Laroche, Cassini, Valentinoda hazırlanmış nadir Haute Couture donları təqdim ediləcək. 

1960-cı illər ötən əsrin ən inqilabi onilliklərindən hesab edilir. Bu dövrün gözlənilməz inqilabiliyi cəmiyyətdə və bununla birgə dəb dünyasında da dəyişikliklər yaratdı. İlk kosmonavt Yuri Qaqarinin 1961-ci ildə, birinci qadın kosmonavt Valentina Tereşkovanın 1963-cü ildə kosmosa uçuşu dəb aləmində yeni iz qoydu və Paris modelyerləri kosmik mövzuya müraciət etdilər.Ayaqqabı formaları, baş geyimlərində və digər aksessuarlarda da əksini tapan kosmik dəb erası 1969-cu ildə amerikalıların Aya ilk enişi ilə sona çatdı. Heydər Əliyev Mərkəzindəki sərgidə bu futuristik ideyaları özündə əks etdirən kifayət qədər paltar, ayaqqabı və baş geyimləri təqdim olunacaq. 

Ekspozisiyada, həmçinin o dövrün məşhur qadınlarının - kino ulduzları Meri Pikford, Qloriya Svenson, Lesli Karon və Loren Bekol, prima-balerina Maya Plisetskayanın şəxsi qarderobundan unikal geyimlər nümayiş etdiriləcək.

Bu sərgi indiyədək Sidney, İstanbul, Sankt-Peterburq, Moskva, Riqa və Dauqavpilsdə təqdim olunub. Lakin belə böyük həcmdə ilk dəfə Bakıda sərgilənəcək. 

Aleksandr Vasilyev tanınmış kolleksiyaçı, dəb tarixçisi, sənətşünas, interyer dekorasiyaçı, teatr rəssamı, dəb sahəsində bir sıra məqalə və kitabların müəllifi, televiziya proqramlarının aparıcısıdır. Onun 40 ilə yaxındır ki, topladığı kolleksiyada XVII əsrdən müasir dövrədək müddəti əhatə edən 50 000 eksponat var. Müxtəlif ölkələrdən əldə olunan eksponatlar arasında öz epoxalarının ən yaxşı atelyelərində hazırlanan yüksək dəb şedevrləri yer alıb. 

Vilnüsdə yaradılmış Aleksandr Vasilyev Fondu Litva və digər ölkələrdə dəb mədəniyyəti və tarixinin təbliğinə yönəlmiş təhsil, kostyum, aksessuar, rəsm, qrafika, foto, dekorativ tətbiqi sənət əsərləri və çap olunmuş nəşrlərdən ibarət kolleksiyanın qorunması, genişləndirilməsi, ictimaiyyətə təqdim olunması istiqamətində fəaliyyət göstərir.

Xəritə